GEORGE NUUS - Die gedenkdiens vir die bekende sakeman en professionele waardeerder, Fanie de Swardt (69), sal op Donderdag 19 Desember om 12:00 by die NG Kerk in George-Suid plaasvind.
De Swardt was 'n geliefde figuur in die George-gemeenskap en het 'n lang loopbaan as waardeerder gehad.
Hy het sy jeug in George deurgebring en was 'n trotse alumni van PW Botha Skool. Voor die onafhanklikheid van Suid-Afrika het hy as waardeerder vir die regering gewerk en na die land se vryheid het hy Suid-Kaap Waardeerders gestig.
Sy besigheid het oor die jare heen landwyd gewerk en het 'n beduidende impak in die veld van eiendomswaardering gemaak.
“Dit is met groot hartseer dat ons afskeid neem van ons kaptein en mentor. Mag hy in vrede rus. Tot weersiens Fanie,” sê Pieter van Zyl, ‘n kollega van 36 jaar.
“ ‘n Groot boom het geval. Baie respek vir hom gehad. Aan jou en die familie innige simpatie en baie sterkte vir julle. Ek dra julle op in my gebede,” sê Wessel van Deventer van Umhlaba Valuers.
De Swardt word oorleef deur sy vrou, Annelé, en hul drie kinders, Valesca Erlank, Coené, en James van Wyk.
Erlank het namens die familie haar opregte dank uitgespreek vir die oorweldigende ondersteuning wat hulle tydens hierdie moeilike tyd ontvang het.
Meegevoel het van regoor die land en verskeie sektore ingestroom. Erlank het ook haar dank betuig aan haar aanlyngemeenskap vir hul volgehoue ondersteuning oor die afgelope vier maande.
Oorlede Fanie de Swardt saam met sy vrou Annelé, en hul seun Coené van Wyk.
‘Ons bring jou die nuutste Tuinroete, Hessequa, Karoo nuus’
