GEORGE NUUS - Helen Zille, die voorsitter van die DA se federale raad, het vandag, 20 April, vrese besweer oor kommer as 'n opvolger vir Leon van Wyk, George se burgemeester, aangewys moet word.
Sy het tydens 'n ontbytgeleentheid vir sakeleiers en DA-ondersteuners gesê daar sal 'n bepaalde proses in die party gevolg word.
Van Wyk is hoog op die DA se kandidatelys vir die Wes-Kaapse wetgewer. Daar is 'n goeie kans dat hy op 29 Mei tot die wetgewer verkies sal word.
Hy sal dan die pos moet ontruim. Agting vir die goeie werk wat hy doen is tydens vandag se geleentheid uitgespreek. Zille het gesê sy is bewus van die kommer.
Sy het die versekering gegee daar sal 'n proses gevolg word om seker te maak daar is kontinuïteit. Na die geleentheid het sy aan die George Herald die versekering gegee daar sal kontinuïteit wees en dat die DA die beste kandidaat sal aanwys.
Leon van Wyk tydens vanoggend se geleentheid. Foto's:Eugene Gunning
‘Ons bring jou die nuutste Tuinroete, Hessequa, Karoo nuus’
