GEORGE NUUS - Katgriep is 'n dodelike siekte wat jong honde baie maklik optel, maar wat voorkom kan word as honde betyds ingeënt word.
Baie mense misgis hulle met die naam katgriep en dink dit is net katte wat die siekte kan opdoen, maar dit is waar hulle verkeerd is. Katgriep of Parvovirus, kom hoofsaaklik by honde en nie by katte voor nie en die siekte word ook nie van katte na honde oorgedra nie.
Op www.proteaanimalclinic.co.za sê dr. WJ Grobler katgriep is 'n ernstige siekte wat deur een van die kleinste siekte-organismes, genaamd Honde Parvovirus veroorsaak word. Die virus kan op 'n persoon se skoensole gedra word - dit is ook die wyse waarop die siekte in 1978 binne 'n paar maande regoor die wêreld versprei het.
Geweldige groot getalle virus word in die braaksel en mis van siek diere aangetref waarvan een gram mis genoeg virus bevat om meer as 10 miljoen honde aan te steek.
• Dikwels hoë koors • Lusteloosheid • Verlies aan eetlus • Aanhoudende braking, skuim om die bek • Diarree wat later bloederig word • Tandvleis wit of blouerig • Buikpyn • Vinnige ontwatering
Die simptome verskyn gewoonlik skielik en die hondjie kan binne 'n paar uur doodgaan.
Dit is van die uiterste belang dat gesonde hondjies op ses weke teen die siekte ingeënt word en weer vier weke daarna 'n skraagdoses ontvang. Let wel, dat honde dan elke vier weke daarna totdat hulle viertien weke oud is, moet ingeënt word. Dit is ook baie belangrik dat teef honde waarmee geteël word, gereeld inentings ontvang.
Behandeling
Volgens dr. WJ Grobler, is daar tans geen goedkoop inspuitbare middels wat virusse in die liggaam doodmaak nie, dus is daar geen spesifieke behandelings as die virus eers in die liggaam is nie.
Die behandeling behels daarom die onderdrukking van bakterieë in die dermkanaal, voorkoming van braking en die herstel van die voginhoud van die liggaam.
• Antibiotika • Teenbraakmiddels • Binne-aarse drup • Inteflora of ander probiotaka om dermflora (nuttige bakterieë) weer aan te vul • Geaktiveerde houtskooltablette om gifstowwe te neutraliseer • Mondelingse eletroliete indien braking opgehou het • Voeding van klein hoeveelhede kos wat geen vet bevat bv. rys en hoender • In erge gevalle bloedoortapping of die toedien van plasma.
'Ons bring jou die nuutste George, Tuinroete nuus'
