GEORGE NUUS - 'n Man (34) wat daarvan beskuldig word dat hy 'n minderjarige meisie agter sy huiswinkel in Rosedale verkrag het, is wéér 'n vry man nadat hy vroeër op borgtog vrygelaat is.
Die beskuldigde is op 7 April in die Thembalethu-streekhof op borgtog van R500 vrygelaat. Volgens die jong slagoffer se familie, is hulle baie ongelukkig hieroor.
"Ons het nie eens geweet hy het borgtog gekry nie, want ons was nie gesê om by die hof te wees nie," het die slagoffer se ma buite die hof gesê.
Toe die saak nog in die George-landdroshof gedien het, het landdros Emma Moloro borgtog geweier nadat lede van die Rosedale-gemeenskap 'n petisielys met 700 handtekeninge teen borgtog by die hof ingedien het.
Die saak is op Maandag 24 November na die Thembalethu-streekhof oorgeplaas.
Die man word daarvan beskuldig dat hy 'n negejarige meisie drie keer in Augustus en weer kort voor sy inhegtenisneming op 22 September agter sy huiswinkel verkrag het.
Die slagoffer beweer dat die beskuldigde haar geld en lekkernye gegee het om stil te bly.
Landdros Nelson Malaudzi het die saak tot 26 Oktober vir verhoor uitgestel. Mnr. Oliff D'Oliviera verskyn namens die beskuldigde en mnr. JJ Marx vir die staat.
Vorige artikels:
- Vermeende verkragter uit op R500 borg
- Winkeleienaar weer in hof vir verkragting
- Opvolg: Vermeende kinderverkragter in hof
- Vermeende kinderverkragter weer in hof
- Vermeende kinderverkragter borg geweier
ARTIKEL: HENRICA VELDMAN, GEORGE HERALD - JOERNALIS.
'Ons bring jou die nuutste George, Tuinroete nuus'
