Ek weet almal is aan die studente se kant en dat dit 'n wonderlike ding is dat ons prêz ingestem het dat daar volgende jaar geen fooi-verhoging sal wees nie, maar ek hoop net hy besef dat hy NOOIT OOIT weer ENIGE fooiverhoging vir studente sal kan deurkry nie.
Dis klaarpraat en verby.
Studiegeldverhogings is geskiedenis, behalwe as niemand omgee dat daar van ons statige sentra van akademiese uitmuntendheid net 'n
bietjie as en hopies roet oorbly nie.
Die afgelope twee weke het ons gesien hoe derduisende, soms aggressiewe studente, die heiligdomme van Luthulihuis, die Uniegebou en die Parlement stormloop. Dit was nie speletjies nie en in die studente se oë kon jy sien hierdie jongmense bedoel besigheid - en dit het nou niks te doen met die vak 'ekonomie en markte' wat party van hulle loop met die oog op 'n toekoms in die sakewêreld en sakke vol waardelose rande nie.
En dis maar net die begin van die studente se stryd aangesien die meeste van hulle ook voorstanders van gratis tersiêre opleiding is. Wat gaan Zuma en kie en al die kanseliers en professore volgende jaar maak as die meeste studente eenvoudig weier om te betaal?
As ek so kyk na die 'kampuslente' soos wat die #feesmustfall opstande gedoop is, dan het die studente nou vir miskien die eerste keer in hulle lewens die hoofdige, verslawende ekstase van mag geproe en sal hulle in die toekoms toenemend '#veldtogte' inspan om hulle sin te kry.
Dit klink dalk nie so nie, maar ek is regtig bly dat die studente hierdie veldtog/veldslag gewen het. Ek het baie pêlle met kinders op universiteit en dit kos 'n fortuin. Behoed die arme paartjies wat tweelinge het - hulle bid seker dat enetjie maar liewers vroeg trou en huisvrou word.
En daar is geld. Talle ekonome het reeds uitgewerk dat as ons regeringslui minder spandeer en meer woeker, ons die nodige geld gespaar sal kry.
Daar is egter net een bekommernis.
Dit is so, maar net as jy gekeur word en elke jaar deurkom. Op die oomblik kan jy vakke sleep en daar is tweede kanse as jy genoeg moola bymekaar kan skraap om weer te probeer. Maar, as die belastingbetaler ten volle vir iemand se studies moet betaal sal dit sekerlik 'n ander storie wees. Die keu-ringsproses sal baie streng wees en 'n tweede kans? Wat wou!
As universiteite gratis grade begin aanbied, mag talle liewe jong mense - of hy en sy nou die vermoë het of nie - dalk ook daarop aandring om te gaan studeer. Ek is seker baie sal argumenteer: "As die koek gratis is dan moet ons almal mos 'n stukkie kry." En watter sagmakertjie gee jy dan gratis aan die wat nie kan gaan studeer nie?
Dit het my aan 'n gesegde laat dink: "Don't tear down a wall unless you are sure why it was put up."
NS - Ek is ook nou uiteindelik op Twitter - volg my by @ilseschoonraad1.
Op die oomblik is my gehoor 'n mooi ronde 10!
DEUR ILSE SCHOONRAAD, GEORGE HERALD-REDAKTEUR
