GEORGE NUUS - 'n Kinderverkragter het Sondagoggend, 13 Desember, by 'n huis in Rosedale, Pacaltsdorp ingebreek en 'n meisie (7) uit haar bed langs haar broer ontvoer en haar in bosse naby verkrag.
Die verdagte het die jong slagoffer na die gruweldaad teruggeneem huis toe waarna sy haar ma wakker gemaak en van die verkragting vertel het.
Die slagoffer het ernstige beserings opgedoen en is na die hospitaal geneem vir mediese behandeling.
Kaptein Malcolm Pojie, die Suid-Kaapse polisiewoordvoerder sê die slagoffer het haar ma omstreeks 04:00 wakker gemaak en gesê dat ‘n onbekende man haar uit haar kamer geneem het en in die bosse daar naby verkrag het.
"Met ons ondersoek is gevind dat die beweerde onbekende verdagte vermoedelik toegang tot die woning gekry het deur die diefwering van hul kamervenster te breek. Dit word gemeld dat die verdagte ‘n masker of balaklawa op sy kop gehad het om sy gesig te verbloem. Die slagoffer het ernstige beserings aan haar geslagdele opgedoen en moes mediese behandeling ontvang. Die slagoffer word deur ons forensiese maatskaplike werkers ondersteun tydens die ondersoek," sê Pojie.
Forensiese deskundiges sowel as lede van die Outeniqua K9-honde-eenheid is na die toneel ontplooi en alle leidrade word opgevolg.
Die polisie het 'n beroep op die publiek gedoen om met inligting oor die voorval navore te kom. Persone met inligting kan die ondersoekbeampte, sersant Cloete by die Gesinsgeweld, Kinderbeskermings- en Seksuele misdrywe-eenheid kontak by 044 803 4618/9.
ARTIKEL: LIZETTE DA SILVA, GEORGE HERALD-JOERNALIS
'Ons bring jou die nuutste George, Tuinroete nuus'
