GEORGE NUUS - Die pa (51) van Denneoord wat sewe van sy dogter se vriendinne verkrag het, is deur 'n sielkundige as 'n pedofiel en reeksverkragter geklassifeer. Hy is Maandag 38 lewenslange vonnisse opgelê in die Thembalethu-streekhof, die meeste lewenslange vonnisse nog wat 'n persoon in Suid-Afrika opgelê is.
Hy het sewe meisies (tussen 10 en12 jaar oud) bedwelm en verkrag wanneer hulle by sy dogter oorgeslaap het.
Hy het die meisies voor slapenstyd slaappille ingegee en hulle daarna verkrag en die dade op kamera vasgelê. Lede van die gesinsgeweld, kinderbeskerming en seksuele misdrywe (GKS)-eenheid het hom op 27 November 2014 by sy huis in Denneoord aangekeer.
Die familie en vriende van die slagoffers, sowel as die aktiviste van die Green Hearts-drukgroep en Women and Men Against Child Abuse, het die vonnis verwelkom.
Die reeksverkragter, wie se identiteit nie bekend gemaak kan word om die kinders se identiteite te beskerm, het tydens die vonnisoplegging geen emosie getoon nie en kop onderstebo gestaan.
Streeklanddros Eugenia Jacobs het in haar uitspraak gesê die man het sy vertrouensposisie met die kinders, wat hom as 'n vaderfiguur gesien het, en hul ouers misbruik en dat hy die kinders van hul onskuld beroof het.
Sy het ook gesê dat hy luidens 'n verslag van 'n sielkundige, brigadier Gerard Labuschagne, as 'n pedofiel en reeksverkragter geklassifiseer kan word, wat weer sal oortree.
Streeklanddros Jacobs het gesê die beskuldige is 'n gevaar vir die samelewing en het die dade as walglik en vernedered beskryf. Sy het gesê dat hy die kinders bedwelm het, nie om hulle enige trauma te spaar nie, maar eerder om te verhoed dat hy uitgevang word.
Sy het ook bygevoeg dat die feit dat hulle nie bewus was van die verkragtings nie, vir die hof 'n verswarende faktor is omdat dit nie minder traumaties was nie.
"Omdat hulle geslaap het, beteken nie dat hulle liggame nie die trauma ervaar het nie, hul liggame het dit geregistreer," het Jacobs gesê. Sy't bygevoeg dat die slagoffers fisiese (maagpyn, kopsere en naarheid) en emosionele veranderige (onder andere vrees, skaamte, konsentrasie-probleme) ondergaan het.
"U het hulle gebruik vir u eie wellus en u optrede was berekend," het Jacobs gesê.
Staatsaanklaer Brandon Smith, het na afloop van die vonnis gesê dat dit 'n regverdige vonnis is.
Martin Borg, die ondersoekbeampte van die GKS-eenheid, het hierby aangesluit en gesê hy is tevrede.
"Ek is doodtevrede, ons het hard gewerk. Ek is bly ons kon hom uit die samelewing verwyder, soos die landdros gesê het," sê Borg. Een van die slagoffers se ma het buite die hof gesê sy is "verlig dis (die hofsaak) is nou verby."
Wat beteken lewenslange tronkstraf?
Volgens die strafproseswethandboek is lewenslange gevangenisstraf, nadat die doodstraf afgeskaf is, die swaarste straf wat ons howe kan oplê. Dit word as gepas beskou in daardie gevalle waar die misdadiger eenvoudig uit die gemeenskap verwyder moet word.
Lewenslange gevangenisstraf is 'n onbepaalde vonnis omdat die duur daarvan, ten tyde van die oplegging onbekend is. Nietemin bestaan die moontlikheid van vrylating steeds. Ingevolge a 78 (1) van die Wet op Korrektiewe Dienste 111 van 1998 kan die minister van korrektiewe dienste, die gevangene op parool vrylaat op aanbeveling van die Nasionale Raad van Korrektiewe Dienste.
So 'n gevangene kan egter nie op parool geplaas word voordat minstens 25 jaar van die vonnis verstryk het nie, of wanneer die gevangene die ouderdom van 65 jaar bereik (indien minstens 15 jaar van die vonnis reeds uitgedien is) - a 73(6).
Gevangenes wat voor 1 Oktober 2004 tot lewenslange gevangenisstraf gevonnis is, kan na 20 jaar vir vrylating oorweeg word - a 136 (3).
Dit is die moontlikheid van parool wat keer dat lewenslange gevangenisstraf ongrondwetlik is.
Klik hier vir vorige artikels:
- Denneoord-pa kry lewenslank vir verkragting
- Verkragter sê ek is baie jammer
- Denneoord-pa moet wag vir vonnis
- Dad guilty of raping daughter's friends
- Denneoord-pa skuldig aan verkragting
- Ma sê slagoffers verdien nuwe lewe
- Seksuele saak van Denneoord pa uitgestel
- Opvolg: Denneoord verkragtingsaak
- Denneoord-pa nog nie gepleit
- Pa gaan glo skuldig pleit op seksklagte
- Pa wat glo dogter se maatjies verkrag in hof
- 3033 klagtes teen pa wat glo verkrag
- Pa wat glo dogter se maatjies verkrag in hof
- Pa wat glo verkrag later weer in hof
- Pa wat vriendinne glo verkrag Maandag in hof
ARTIKEL: LIZETTE DA SILVA, GEORGE HERALD-NUUSREDAKTEUR
'Ons bring jou die nuutste George, Tuinroete nuus'
