SUID-KAAP NUUS - 'n Merino-dag wat op 26 Mei by die Cooper Veilingskrale op Mosselbaai plaasgevind het, is vir die 38ste keer deur BKB en die Nasionale Wolkwekersvereniging (NWKV) aangebied, wat dit ook een van die oudste Merino kudde kompetisies in die land maak.
Dit is 'n wonderlike prestasie en getuigskrif vir die streek en sy skaapboere. Vanjaar het 10 deelnemers meegeding en weereens was die gehalte van ooie baie goed en uniformiteit tussen die ooie was uitstekend. Elke deelnemer het homself gemeet aan sy mede-deelnemers om sodoende te sien waar sy kudde verbeter kan word, wat immers die doel van die evalueringsdag is.
Die kompetisie is beoordeel deur Gawie van Wyk (NWKV: Carnarvon) wat hom goed van sy taak gekwyt en die deelnemers hom baie geniet het. Die punte is deur Pierre Vlok (bestuurder: BKB Vesels Westelike streek) verwerk.
Werner Olivier (BKB Wol tegniese beampte: Port Elizabeth) het gepraat oor wolsake wat almal baie interessant gevind het. Pieter Aucamp (BKB Skaap en wol adviseur: Riversdal), Bennie Pienaar (voorsitter: Kleinberg, Mosselbaai), Hennie Senekal (BKB Lewende Hawe) en Deon Greyling (BKB Skeerdiens: Oudtshoorn) het gehelp met die reëlings om die dag 'n reuse sukses te maak. Die dag is afgesluit met 'n prysuitdeling en 'n heerlike spitbraai.
Wenners
Algehele wenner: André de Jager - Swartklip, Albertinia; 2. Saag Jonker Familie Trust - Schoonberg, Herold.
Beste Wol: 1. André de Jager - Swartklip, Albertinia; 2. Jurie Muller - Ouland, Mosselbaai.
Beste Bouvorm: 1. André de Jager - Swartklip, Albertinia; 2. Saag Jonker Familie Trust - Schoonberg, Herold.
Beste Ooi: 1. Saag Jonker Familie Trust - Schoonberg, Herold; 2. André de Jager - Swartklip, Albertinia.
Beste vordering: 1. Jurie Muller - Ouland, Mosselbaai; 2. Mias Nieuwoudt - Eseljacht, Herold.
Wenner 300 - 500 ooie: 1. Jurie Muller - Ouland, Mosselbaai; 2. Flip Fivaz - Arbeidsloon, Mosselbaai.
Al die borge, deelnemers en persone wat betrokke was by die baie suksesvolle dag word bedank. "Julle betrokkenheid en positiewe gesindheid word opreg waardeer en dit is wat maak dat hierdie Merino kuddedag elke jaar net beter word," aldus die organiseerders.
Van links agter: Pierre Vlok, Willem Oosthuizen (Swartklip, Albertinia), Martinus Honiball (Sandfontein, Mosselbaai), Flip Fivaz, Corneulus Muller (Hagelkraal, Hartenbos), Francois Malherbe (Kweekkraal, Riversdal), Pieter Reynolds (Eseljacht, Herold), Pieter Aucamp en Willem Oosthuizen (Môreson, Albertinia). In die middel van links sit Werner Olivier, Frikkie van der Walt (Schoonberg, Herold), André de Jager, Jurie Muller en Louise Muller. Voor is Bennie Pienaar.
'Ons bring jou die nuutste Tuinroete, Klein-Karoo, Hessequa nuus'
