Stefan 'n aartjie na sy vaartjie

GEORGE NUUS - Om die seun van 'n bekende kunstenaar te wees het sy eiesoortige uitdagings. Georgiet Stefan de Beer, is 'n voltydse skilder en het gelukkig oor die afgelope twee dekades sy eie kenmerkende aanslag en kunsstyl ontwikkel.

Stefan beter bekend as Stef, het deur navorsing te doen en te eksperimenteer sy kunswerk uitgebrei en vandag is hy 'n skilder in eie reg. Sy skilderye word by Crouse-kunsgalery in die Eden-leefstylsentrum uitgestal en in talle kunsgalerye in Pretoria en ander Suid-Afrikaanse kunsgalerye.

Tans geniet hy dit om vinnige pensketse te maak waarvan hy vir die eerste keer verlede week 'n uitstalling in sy Bodorp-woning gehad het.

Sy vader, André de Beer, 'n bekende in die Suid-Afrikaanse kunswêreld was uiters veelsydig en het tot op die ouderdom van 80 nog aktief geskilder. 'n Beperkte oplaag van André se werke is vervat in 'n koffietafelboek.

De Beer senior het op 'n vaardige manier Kaapse tonele vasgelê alhoewel hy vir dekades 'n Pretoriaanse kunsdosent was. Hy het selfs brons beeldhouwerk gedoen en op sy dae heelwat tyd deurgebring in Distrik 6 en het die inwoners en die besonderse omgewing op 'n unieke wyse vasgelê. 'n Paar boeke is nog beskikbaar. Skakel Stef by 083 359 2954 indien jy belangstel.

Kuns is dus in die De Beers se gene. Stefan het nooit lesse by sy pa geneem nie en het 20 jaar gelede voltyds begin skilder nadat hy George toe getrek het. Hy deel gewis sy vader se passie om tonele te skilder waarin kinders in die see baljaar, op sportgronde en in menige ander prettige omgewings. In die twee dekades het hy ook gewis die slag gekry om wildlewe heel fyntjies op doek vas te lê. Stef se akrielskilderye is kleurvol en interessant en sy portretstudies boeiend.

"Ek probeer realisties skilder, maar my werk word meer as impressionisties beskryf," vertel Stef met 'n glimlag.

Gesellige huis
Heelwat van sy eie skilderye en die van kunstenaars wat hy bewonder verleen styl en kleur aan sy huis waar sy vrou Shaloo, 'n plaaslike onderwyseres, 'n stylvolle dog huislike atmosfeer skep. 'n Speelkamer dien tans as sy uitstalarea en sy kuierstoep langs sy ateljee getuig van saamkuiertjies om die braaivuur.

Hy beoog om weer 'n uitstalling te hou, maar sal dan betyds kunsliefhebbers in kennis stel.