GEORGE NUUS - Die 51-jarige man van Denneoord wat van 3 033 klagtes aangekla word, gaan volgens sy regsverteenwoordiger eersdaags skuldig pleit nadat die saak Maandag in die Thembalethu-streekhof uitgestel is.
Die klagtes sluit in seksuele aanranding, verkragting asook die vervaardiging en besit van kinderpornografie. Daar word beweer dat die beskuldigde die dade met sewe van sy dogter se vriendinne (toe tussen die ouderdomme van 10 en 12 jaar oud) gepleeg het.
Hy het na bewering die kinders slapenstyd met pille bedwelm en hulle dan verkrag en die dade op kamera vasgelê. Die voorvalle het na bewering tussen 2012 en 2014 plaasgevind.
Die beskuldigde, wat op die oog af heel 'ordentlik' voorkom, se hare is grys en hy is van middelmatige bou. In die hof was hy netjies geskeer en in 'n T-hemp en 'n langbroek geklee. Hy het uitdrukkingloos sy plek in die beskuldigdebank ingeneem.
Sy regsverteenwoordiger Marius van Huyssteen het aan die hof gesê dat sy kliënt skuldig gaan pleit, maar dat hy verslae ter versagting van vonnis wil aanvra.
Landdros Eugenia Jacobs het die saak tot Maandag 30 November uitgestel.
Joanne Barrett, die woordvoerder van Women and Men Against Child Abuse (WMACA) het in 'n persverklaring gesê dat die beskuldigde 'n gepaste vonnis vir die misdade wat hy gepleeg het, moet ontvang.
"Ons eis dat sy pleitooreenkoms lewenslange vonnisse vir elke verkragting en elke misdryf met betrekking tot kinderpornografie moet insluit."
Lede van die kinderregte organisasie, The Green Hearts van Plettenbergbaai, wat die hofverrigtinge bygewoon het, het met die groen harte op hulle T-hemde, in die hof uitgestaan.
Die beskuldigde bly in aanhouding. Brendon Smith verskyn namens die staat.
Klik hier vir vorige artikels:
- Pa wat glo dogter se maatjies verkrag in hof
- 3033 klagtes teen pa wat glo verkrag
- Pa wat glo dogter se maatjies verkrag in hof
- Pa wat glo verkrag later weer in hof
- Pa wat vriendinne glo verkrag Maandag in hof
'Ons bring jou die nuutste George, Tuinroete nuus'
