GEORGE NUUS - Die historiese Klipkerk in Pacaltsdorp het op Sondag 6 September amptelik heropen ná ’n omvangryke restourasieproses wat daarop gemik was om dié kosbare erfenisbaken vir toekomstige geslagte te bewaar.
As die oudste kerkgebou in die Tuinroete en die sesde oudste in Suid-Afrika, staan die Klipkerk sedert sy inwyding in 1825 as ’n simbool van geloof, hoop en gemeenskap.
Die heropening is met groot dankbaarheid deur die plaaslike gemeente en gemeenskap gevier.
Eerw. dr. Arthur le Roux, konsultant van die plaaslike Pacaltsdorp United Congregational Church (UCC), het die toewydingseremonie gelei. Die boodskap was uit Esegiël 47, waar die profeet verwys na water wat uit die heiligdom vloei en lewe bring waar dit ook al gaan. Die gemeente het sy waardering uitgespreek om weer in sy historiese tuiste vir aanbidding, gemeenskap en diens aan God te kan bymekaarkom.
Die pragtige Klipkerk in Pacaltsdorp nadat die restorasieproses onlangs voltooi is. Foto: Marguerite van Ginkel
Die George Heritage Trust het ’n strategiese rol in die restourasieproses gespeel om toe te sien dat die herstelwerk aan toepaslike historiese en argitektoniese standaarde voldoen. Die trust het in samewerking met Erfenis Wes-Kaap, plaaslike bewaringskundiges en die gemeenskap gewerk om ’n balans tussen strukturele versterking en historiese egtheid te handhaaf.
Die Klipkerk is ’n provinsiale erfenisterrein en was voorheen ’n nasionale erfenisterrein.
Besondere erkenning is aan Willie-John van Niekerk, voorsitter van die George Heritage Trust, gegee vir sy leierskap en rol in die mobilisering van hulpbronne en kundigheid vir die projek. Joe McGluwa, voorsitter van die portefeuljekomitee: Sport, Kultuur en Kuns, was ook by die restourasieproses betrokke.
As deel van die projek het die Trust ook twee nuwe inligtings- en gedenkplate by die kerk aangebring. Dié plate bied historiese inligting oor die gebou en dra by tot die bewaring van Pacaltsdorp se erfenis.
Nuwe gedenkplate is aangebring. Foto: Marguerite van Ginkel
Die gemeente het sy dank uitgespreek teenoor almal wat tot die restourasie bygedra het, insluitend George Herald, donateurs en ander ondersteuners.
Die heropening van die Klipkerk is ’n belangrike mylpaal in die bewaring van Pacaltsdorp se geskiedenis en ’n herinnering aan die gebou se voortgesette rol in die gemeenskap.
‘Ons bring jou die nuutste Tuinroete, Hessequa, Karoo nuus’
