VERMAAK NUUS - George se gewilde Eden Camerata-kamerkoor nooi musiekliefhebbers na een van die hoogtepunte van die koor se jaarprogram, hulle afsluitingskonsert, op 5 Desember om 19:00 in die St. Marks-katedraal, Cathedralstraat, George.
Tydens die konsert word die jaar se 2025-program aangebied. Hierdie jaar kan gewyde werke van onder andere Bruckner, Gjeilo, Lamprecht en Hagenberg gehoor word.
Die konsert sal afgesluit word met pragtige ligte werke in Afrikaans, Engels, Frans, Sweeds en Zulu.
Die jaarlikse afsluitingskonsert is baie gewild en die katedraal is gewoonlik vroegaand reeds vol. Almal word uitgenooi om hierdie gratis konsert by te woon. Donasies wat help om die koor se onkostes te dek, sal opreg waardeer word.
Eden Camerata het pas teruggekeer van 'n suksesvolle reis en optrede in Prins Albert en omgewing waar hulle The Showroom se verhoog betree het met 'n verskeidenheid van musiek vir elke smaak.
Die bekende operasanger Daniël Verster, het saam met die koor opgetree. Buiten sy solo's was die liedere van Benny Andersson en Rodgers and Hammerstein baie gewild.
Die koor, asook die Prins Albert-koor, het Sondagoggend tydens die Kerssangdiens daar pragtige Kersmusiek gesing. Die gesamentlike koor het die gewilde Kyrie uit Schubert se Mis in G majeur gesing.
Eden Camerata in die Kangogrotte.
Op pad terug vanaf die pragtige Karoo-dorpie het die koor 'n draai gemaak in die eeue oue Kango-grotte. Die werk, Kangoklanke (gekomponeer deur Chris Lamprecht) wat die grotte beskryf en besing, is in die groot saal gesing.
Op aandrang van 'n besoekende oorsese toergroep is 'n tweede werk, naamlik die besonderse Duitse Kerslied, Es ist ein Ros entsprungen, gesing waar die harmonieë in die wonderlike akoestiek van die grotte bly hang het.
In The Showroom in Prins Albert.
‘Ons bring jou die nuutste Tuinroete, Hessequa, Karoo nuus’
