Selfie kaalfoto's van tieners ondersoek

Generiese foto.

GEORGE NUUS - Kaalfoto's wat twee hoërskoolmeisies glo aan tienerseuns gestuur het en vanwaar dit verder versprei is, vorm nou deel van 'n polisie-ondersoek.
 
Die seuns het glo ook kaalfoto's van hul privaat dele terug aan die meisies gestuur. Dit is onwettig om dié soort inhoud te vervaardig, te versprei of te besit, al neem albei partye vrywillig daaraan deel.
 
Aanklaers van die nasionale vervolgingsgesag (NVG) het na verneem word 'n praatjie by die vooraanstaande skool waar die leerders skool gaan gehou. Daar is oor onder andere "sexting" gepraat het.
 
Een van die seuns wat van die kaalfoto's ontvang het, het dit na afloop van die praatjie gerapporteer en die polisie is gekontak.
 
Kapt. Malcolm Pojie, die Suid-Kaapse polisiewoordvoerder, het vandeesweek bevestig dat hulle klagtes van vervaardiging, besit en verspreiding van kinderpornografie ondersoek na aanleiding van die foto's wat die meisies uitgestuur het.
 
"Die voorvalle is vroeër die maand aan die polisie gerapporteer, maar het oor 'n tydperk plaasgevind. Die saak sal volledig ondersoek word en die dossier sal aan die senior staatsaanklaer voorgelê word vir 'n beslissing. Die moontlikheid bestaan ook dat meer kinders betrokke kan wees. Soos die ondersoek ontvou sal die nodige verklarings en bewyse verkry word," sê Pojie.
 
"Ons wil ook 'n ernstige waarskuwing aan kinders rig om versigtig om te gaan met die gebruik van sosiale media netwerke. Die blote neem van foto's van privaat dele van minderjariges kom op kinderpornografie neer en kan persone vervolg en streng vonnisse opgelê word," verduidelik Pojie.
 
Hy sê ook behalwe die emosionele skade, kan kinders wat betrokke is by die vervaardiging van kinderpornografie se name ook op die register vir seksoortreders beland. Kinders moet ook in ag neem dat as hier tipe foto's van hulle eers op die Internet is, en selfs op hul fone, dit nooit uitgewis kan word nie.
 
As die foto via jou selfoon uitgestuur is behoort dit nie meer aan jou nie, en ook het jy geen beheer oor hoe dit gebruik word nie. Ook nie watter uitwerking dit op jou reputasie sal hê nie.
 
 
ARTIKEL: LIZETTE DA SILVA, GEORGE HERALD-NUUSREDAKTEUR
 
'Ons bring jou die nuutste George, Tuinroete nuus'


Show comments

Copyright 2017 Group Editors Co PTY Ltd t/a George Herald