RUGBY NUUS - Heidelberg het Saterdag in hul tuiswedstryd die 'immergroen' Evergreens van Pacaltsdorp lelik laat verlep om die Superliga A-rugbywedstryd met 32 - 16 te wen. Heibi was teen rustyd met 12 - 3 voor.
Die tuisspan het met dié spogvertoning aan hul fanatiese en lojale ondersteuners gewys dat hul nog goed op pad is om vir die halfeindstryd te kwalifiseer.
Heibi het ook 'n waardevolle bonuspunt met hul vier drieë verseker. Die besoekers het egter nie handdoek ingegooi nie en het hard probeer om op dreef te kom, maar die keer was die tuisspan se verdediging rotsvas en kon die besoekers net een keer gaan druk.
Heibi se punte is deur Jason Liebenberg (senter), André Maxin (flank), Marcelino Manho (stut) en Lorenzo Gordon (regtervleuel), met een drie elk, terwyl Eslin Naudt (losskakel), met drie doel- en twee strafskoppe geslaag het.
Heibi se C-span het naelskraap met 19 - 21 verloor nadat hulle rustyd met 12 - 7 voorgeloop het.
Heibi se puntemakers was Laughton Peterzen (stut), met twee drieë, en Sadrick Pieters (flank), met een drie.
Tertius Josephs (losskakel), het twee drieë verdoel.
Heibi se tweedes het met 26 - 20 gewen nadat hulle rustyd 9 - 12 agter was.
Heibi se punte is deur Alcano Vollenhoven (heelagter), Reginald Salmon (senter) en Cecil Meyers (slot), met een drie elk, terwyl Germaine Hoogbaard (skrumskakel), drie strafskoppe, en Carlo Williams (plaasvervangerlosskakel), een doelskop bygevoeg het.
Heibi speel Saterdag 19 Augustus weg teen Progress van George.
‘Ons bring jou die nuutste Tuinroete, Hessequa, Karoo nuus’
