SPORT NUUS - Vir ’n jong seun, wat jare gelede op ’n rugbyveld by Laerskool Outeniqua sy droom begin najaag het, moes Saterdagmiddag op Emirates Airline Park (voorheen Ellispark) ’n oomblik gewees het wat moeilik in woorde vasgevang kan word.
Paul de Villiers het vir die eerste keer teen die All Blacks uitgedraf.
Dit was nie sommer net nog ’n toetswedstryd nie. Dit was die eerste hoofstuk van ’n viertoetsreeks tussen twee van die grootste rugbylande ter wêreld en, vir die 23-jarige De Villiers, ’n persoonlike mylpaal wat hom nog ’n tree verder op ’n merkwaardige reis geneem het.
Maar rugby het min simpatie met drome.
Nieu-Seeland het Suid-Afrika met 33 - 16 geklop en die Springbokke se lang wenreeks beëindig. Wat die nederlaag egter nie kan wegneem nie, is die indruk wat De Villiers in sy eerste groot toets teen Nieu-Seeland gemaak het.
Die jong flank het van die eerste minute af gewys dat hy nie deur die grootheid van die geleentheid oorweldig sou word nie. Hy was fisiek gewillig om die harde werk te doen en het hom telkens in die middel van die aksie bevind.
Een van sy vroeë hoogtepunte was ’n belangrike balsteel, terwyl sy verdedigende werk hom verder laat uitstaan het. Hy het 15 duikslae gemaak en die bal vyf keer gedra, ’n aanduiding van die enorme hoeveelheid werk wat hy verrig het. Van die kenners het hom selfs as een van Suid-Afrika se beste spelers van die wedstryd beskryf.
En tog was dit uiteindelik ’n nederlaag. Die Springbokke het rustyd met 13 - 12 voorgeloop en het genoeg geleenthede gehad om die All Blacks onder groter druk te plaas. Maar waar Suid-Afrika gesukkel het om sy geleenthede in punte te omskep, het Nieu-Seeland genadeloos toegeslaan. Die All Blacks het vyf drieë teenoor Suid-Afrika se een gedruk.
Vir De Villiers moes daar dus ’n vreemde mengsel van emosies gewees het: die trots om teen die All Blacks te speel, die teleurstelling oor die nederlaag en dalk, belangriker as alles, die wete dat hy op hierdie vlak hoort.
Die pad na hierdie oomblik was ook nie ’n kort een nie. De Villiers is ’n produk van Oakdale se rugbystruktuur en het later deur die Westelike Provinsie- en Stormers-stelsel beweeg. Hy was ook kaptein van die Junior Springbokke in 2023, voordat hy sy plek in die senior Springbokgroep gevestig het.
Springbok-afrigter Rassie Erasmus het die jong flank, Paul De Villiers, beskryf as ’n speler met ’n volwassenheid ver bo sy jare en die ingesteldheid van ’n vegter.
Foto: Johan Orton / Caxton Media
Sy Springbok-debuut het vroeër vanjaar gekom toe hy op kort kennisgewing teen Engeland ingespring het. Sedertdien het sy selfvertroue en invloed week ná week gegroei.
Nou het hy sy eerste toets teen die All Blacks agter die rug en, hoewel die uitslag nie was waarop Suid-Afrika gehoop het nie, het Paul de Villiers iets baie belangriker gewen: respek.
Afrigter Rassie Erasmus het ná die wedstryd gesê De Villiers het goed gespeel en dat daar geen rede is om hom uit die span te hou indien Siya Kolisi nie reg is nie. Vir ’n jong rugbyspeler uit die Suid-Kaap is dit ’n besondere boodskap.
Die span wat Maandag vir die tweede toets in Kaapstad bekend gemaak is, het De Villiers en Kolisi in hakies, mits die tweemalige Wêreldbekerwenner en kaptein se besering herstel.
Die eerste toets is verby en die nederlaag sal bly staan. Maar vir Paul de Villiers is hierdie reis waarskynlik nog maar net die begin.
‘Ons bring jou die nuutste Tuinroete, Hessequa, Karoo nuus’
