GEORGE NUUS - Daar was weer 'n bekende gesig oor die wenstreep van die Knysna Forest-halfmarathon tydens die 40ste herdenking van die Knysna-oesterfees se vlagskipgeleentheid op Saterdag 5 Julie.

Nedbank-atletiekklub se Lloyd Bosman het wéér sy titel verdedig deur die halfmarathon met oortuiging te wen.

"Dit was 'n wonderlike gevoel om Saterdag weer te kon deelneem aan die Knysna Forest 21 km-wedloop en as wenner weg te stap. Wat dit so ongelooflik maak was om die podium met drie ander manne van ons oefengroep, die Pacaltsdorp Running Tribe, te deel. 

"Dit was koud soos altyd, maar natuurlik baie mooi. Ek is net dankbaar vir so 'n ongelooflike wedloop," het Bosman vroeër die week aan George Herald gesê.

Bosman het die wedloop in 'n tyd van 01:03:55.5 voltooi, sowat vier minute voor sy naaste mededingers, Francois Maquassa (in tweede plek) en Bruce Maboza, albei ook van Nedbank.

Die geleentheidsaanbieder, John Walland, het gesê Bosman "is al gewoond daaraan om dié wedloop te wen", en hierdie keer was geen uitsondering nie.

Sy gereelde prestasies maak hom een van die topatlete in die streek, en hierdie herhaalde oorwinning bewys wat vasberadenheid en deursettingsvermoë kan verrig.

In die 42 km-afstand was die wedloop 'n moeiliker uitdaging, met Tshepo Mathibelle, ook van Nedbank, wat as wenner in 'n tyd van 2:24:48 klaargemaak het. 

Sy sterk laaste helfte het baie verras toe hy saam met 'n stroom halfmarathonatlete oor die wenstreep kom. "Dit was moeilik teen die einde," het hy gesê.

In die vroueafdeling het Danè Cronjé van Gqeberha die marathon gewen met 'n tyd van 3:13:44, terwyl Ebeth Marais, ook van Gqeberha, haar eerste oorwinning behaal het in die halfmarathon met 'n tyd van 1:17:24.

Wedlooporganiseerder Wayne Kidd het gesê die terugvoer van deelnemers was uitmuntend, veral oor die goed beplande waterpunte wat tydens die kouer dag baie welkom was.

Meer as 7 500 medaljes is aan deelnemers uitgedeel, met sowat 1 000 in die marathon en meer as 6 000 in die halfmarathon. 

In totaal was daar sowat 8 600 inskrywings met slegs 'n paar wat nie die wedloop voltooi het nie.

Dillan Mentor op pad na die eindstreep. Atlete het van oor die land gekom om deel te neem. Foto: Kristy KolbergAtlete kort voor hulle afgedraai het na Simola. Foto: Kristy Kolberg

Eresgas by die Knysna-marathon was ons Comrades-legende, Louis Massyn. Saam met hom is medeatlete van die Outeniqua Harriers, Duppie du Preez en Nerine Jordaan. Foto: Jeff Ayliffe

‘Ons bring jou die nuutste Tuinroete, Hessequa, Karoo nuus’