GEORGE NEWS - Inwoners van Waboomskraal het onlangs toegang gekry tot inligting, ondersteuning en verskeie dienste tydens ’n Gemeenskapswelstandsdag wat by die Waboomskraal Thusong-dienssentrum aangebied is.
Die geleentheid het verskeie diensverskaffers en organisasies byeengebring en inwoners die geleentheid gebied om direk met rolspelers te skakel, vrae te vra en meer uit te vind oor die dienste en programme wat in die gemeenskap beskikbaar is.
Adam (Attie) Lewie van die Waboomskraal Thusong-dienssentrum het die deelnemers en inwoners verwelkom en die doel van die dag verduidelik.
Die bevordering van ’n gesonde leefstyl en bewustheid van fisiese, emosionele en sosiale welstand was van die belangrikste temas van die dag.
Kinders is ook bewus gemaak van die gevare van kinderhandel. Zelda Barnard van Stop Trafficking het met die kinders oor die onderwerp gesels en klein poppies aan hulle uitgedeel as ’n herinnering dat hulle spesiaal en geliefd is.
Zelda Barnard van Stop Trafficking het tasbare materiale soos plakkate, prente en poppies gebruik om veral die jongspan oor mensehandel in te lig. Foto: Verskaf
Adjudant-offisier Wendy Lee van die Herold-polisie het ook aan die geleentheid deelgeneem en bygedra tot die bewusmaking rondom kinderhandel en die beskerming van kinders.
Die dag het inwoners die geleentheid gebied om in ’n informele en ondersteunende omgewing met diensverskaffers te skakel en meer te leer oor hulpbronne en programme wat tot hul beskikking is.
Attie Lewie spreek die gemeenskap toe by die welstandsdag in Waboomskraal. Foto: Verskaf
Die deelnemende organisasies was People Against Substance Abuse, Famsa, Options Care Centre, Herold-polisie, Waboomskraal E-Centre, TB & HIV Care, Bethesda, Waboomskraal Primêr, die MIV- en vigskantoor, gemeenskapsontwikkeling, George-munisipaliteit en Stop Trafficking.
Lewie het namens die George-munisipaliteit al die deelnemende organisasies bedank vir hul bydrae tot die sukses van die dag.
AO. Wendy Lee van Herold-polisie praat met die kinders en grootmense oor mensehandel en die gevare om voor uit te kyk. Foto: Verskaf
‘Ons bring jou die nuutste Tuinroete, Hessequa, Karoo nuus’
