Waarskuwing: Hierdie berig bevat grafiese inhoud wat sensitiewe lesers kan ontstel.
GEORGE NEWS - Rachel Barry (60) van Reierstraat in Pacaltsdorp is Maandagoggend, 16 Febru-arie omstreeks 07:00, na bewering deur haar buurvrou se Amerikaanse veghond (pit bull)-kruising aangeval. Sy is ná die voorval gehospitaliseer.
Barry vertel dat sy, soos gewoonlik, haar kleinkind by die hek gaan afsien het toe sy die hond buite haar erf gewaar. Volgens haar loop hy gereeld rond en het sy hom voorheen verjaag.
"Ek het hom weer probeer wegjaag, maar dié keer het hy my aangeval," sê sy.
Sy vertel die hond het haar bespring en sy het op haar rug geval. Sy het met haar hande en arms probeer keer, maar die hond het glo herhaaldelik teruggekom en haar aan haar sy gebyt.
Volgens Barry het sy tydens die val 'n lae rugfraktuur opgedoen. Mediese personeel het bevestig dat sy 'n L1-fraktuur het. Sy sê haar dokter het aanbeveel dat sy weens die besering nie meer moet werk nie.
Haar kleinseun het ingespring en die hond probeer wegstamp. In die geharwar het hulle die hek oopgelaat, waarna haar rottweiler uitgehardloop het en die veghond aangeval het in 'n poging om haar te beskerm. Die veghond het weggehardloop, en sy het haar rottweiler teruggeroep. Hy het onmiddellik teruggegaan in die erf en agter die hek gebly.
Rachel Barry het beserings aan haar rug en sy opgedoen. Foto: Verskaf
Volgens Barry glo sy dat, as die hond haar nie gebyt het nie, dit waarskynlik haar kleinkind sou gebyt het.
Die eienaar se seun het glo ook probeer ingryp en beweer nou dat Barry se rottweiler hom aangeval het. Barry ontken dit en sê sy kon alles sien waar sy op die grond gelê het. Sy sê sy is erg getraumatiseer en ervaar steeds baie pyn.
Barry beweer verder dat die betrokke eienaar se honde al voorheen uitgebreek en mense aangeval het, insluitend haar kleinkinders.
Haar kleindogter, Racquelle Barry (17), is op 10 Oktober 2021 deur 'n vorige Amerikaanse veghond van dieselfde eienaar aangeval.
Daardie hond is verwyder, maar volgens Barry is dit met 'n ander veghond vervang.
Haar kleinseun, Le-bron Barry (10), is op 26 Julie 2024 aangeval.
Racquelle Barry, Rachel Barry se kleindogter, is na bewering deur dieselfde eienaar se vorige veghond op 10 Oktober 2021 aangeval. Barry het 'n saak by die polisie aanhangig gemaak. Foto: Verskaf
Barry sê sy het die voorvalle by die polisie aangemeld, maar nog geen terugvoer ontvang nie. Sy beplan om, sodra sy uit die hospitaal ontslaan word, nog 'n saak teen die eienaar van die hond aanhangig te maak.
Volgens die Tuinroete-dierebeskermings-vereniging het inspekteur Henrico Pypers die toneel omstreeks 07:25 besoek.
Die eienaar het die sewejarige veghond-kruising aan die DBV oorhandig. Die DBV het bevestig dat daar konflik tussen bure was, maar geen dierewelstand-probleme is tydens inspeksie waargeneem nie.
George Herald het ook navraag by die polisie gedoen, maar teen druktyd nog geen terugvoer ontvang nie.
‘Ons bring jou die nuutste Tuinroete, Hessequa, Karoo nuus’
