GEORGE NUUS - 'n Berig verlede week oor die dood van 'n swanger tiener (14) by George-hospitaal tydens haar kraam einde April het wye reaksie ontlok.
Sommige kommentaar op sosiale media kritiseer die ouers, die hospitaal en ander die samelewing in die geheel.
Dit is belangrik om te besef dat die spesifieke omstandighede rondom die voorval nie duidelik is nie, en was die artikel se doel grotendeels om lig op die onderwerp te plaas, vrae te vra rondom die optrede teenoor die volwassene wat haar swanger gemaak het, en om haar te eer na haar dood.
Sy het die grootste prys betaal vir 'n samelewing wat haar gefaal het.
Statutêre verkragting
Suid-Kaapse polisiewoordvoerder, sers. Chris Spies, het verlede week gesê dat daar wel 'n saak van statutêre verkragting in Januarie vanjaar by die Thembalethu-polisie geopen is.
Die tienermeisie was toe 13 jaar oud. Spies het intussen bevestig dat daar nog geen arrestasie gemaak is nie, maar het gesê die polisie se eenheid van gesinsgeweld en seksuele misdrywe (GKS) stel verdere ondersoek in rondom die omstandighede van die swangerskap.
Options
Verlede week het George Herald gefokus op die uitdagings van tienerswangerskappe en hulpbronne wat beskikbaar is in die Wes-Kaap, hoofsaaklik in Kaapstad. Daar is egter ook hulpbronne beskikbaar vir die jeug en gesinne in George en omliggende gebiede.
Oor die laaste 28 jaar ondersteun YFC se Options Care Centre in George jeug en gesinne, met tienerswangerskap as 'n sleutelfokus. Gratis dienste word weeksdae van 09:00 tot 16:00 aangebied, insluitend swangerskap- en MIV-toetse, krisisberading in Afrikaans, Engels en Xhosa, en voorgeboorte klasse vir gesonde swangerskappe en bande tussen ouers en hul kinders.
Die Tienermoeder-steungroep vergader weekliks om vaardighede en bemagtiging te bevorder, terwyl Legacy Dads-werksessies jong pa's help om 'n band met hul kinders te vorm. Die Learn to Earn-projek ondersteun skoolwerk, doelwitstelling en basiese behoeftes.
Deurlopende berading betrek gesinne, en skoolprogramme onderrig jeug oor gesonde seksuele besluite. Vir diegene wat nie 'n ouer kan wees nie is daar ondersteuning vir aannemings via Options, die departement van maatskaplike dienste, George-hospitaal en Procare/Norsa.
Hulle kan help
Besoek Options by Albertstraat 54, George, of kontak 044 874 7414 of WhatsApp 072 894 3514.
Ander dienste sluit Kidstop se naskoolsorg en ouerskapkursusse in, met steun van Badisa, Kinderwelsyn, DSD, ACVV, Famsa, plaaslike klinieke en Inkcubeko Jeugwetenskapsentrum, wat jeug uit areas soos Touwsranten en Wilderness verwelkom.
‘Ons bring jou die nuutste Tuinroete, Hessequa, Karoo nuus’
