GEORGE NUUS - 'n Opgewonde afwagting, wat sterte laat swaai en harte laat smelt het, het Vrydag 11 April by die Groenkloof-aftreeoord geheers met hul heel eerste viering van Internasionale Troeteldierdag.
Dié dag, wat jaarliks wêreldwyd gevier word, het 'n gepaste tuiste by Groenkloof gevind - 'n gemeenskap bekend vir sy troeteldiervriendelike benadering.
Die geleentheid was veel meer as net 'n kalenderdatum, dit was 'n viering van die diep betekenisvolle verhouding tussen die inwoners en hul troeteldiere, en 'n erkenning van die belangrike rol wat troeteldiere in die emosionele en fisieke gesondheid van ons inwoners speel.
Die hoogtepunt van die dag was die poot-vriendelike-spyskaart bedien deur The Hub House Restaurant, wat die geleentheid met entoesiasme aangebied het.
Troeteldiere het gesmul aan lekkernye soos pup cakes, bark bites en roomys vir honde, terwyl hul eienaars hul eie geregte geniet het.
The Hub House se bestuurder, Tara Balie, sê die poot-vriendelike-spyskaart sal vir die voorsienbare toekoms deel van hul spyskaart bly.
'n Fotohoekie, gebou deur inwoners van die aftreeoord, Jo van Tonder en Shaun Kieswetter, het pragtige herinneringe van troeteldiere en hul eienaars vasgevang.
Spesiale gaste, Susan van Vuuren van die Groenkloof Glen-huiseienaarsvereniging, die DBV, Paws on Route, ODIN en Vital Vet het ook die geleentheid bygewoon. Die dag was 'n spesiale geleentheid waar troeteldiere die eregaste was.
En, soos die laaste pootafdrukke van die Hub House-stoep af verdwyn het, was dit duidelik - Groenkloof se eerste Internasionale Troeteldierdag was nie net 'n sukses nie, maar die begin van 'n pragtige nuwe tradisie.
Gerhard en Corlia Barnard met Tia (voor), en Rudy Niese en Carla Molier met Nux die Schnauzer, op haar skoot, geniet die dag se versnapperinge.‘Ons bring jou die nuutste Tuinroete, Hessequa, Karoo nuus’
