GEORGE NEWS - Die uitslae is in: GO GEORGE het 'n tevredenheidsgradering onder passasiers van 91% behaal.
Die jaarlikse opname, wat in opdrag van GO GEORGE gedoen is en deur sosio-ekonomiese navorsingspesialiste gedoen is, het ten doel om die makro- en vervoer-ekonomiese impak op die busdiens te bepaal.
Die data-insameling het gedurende Oktober 2024 in alle operasionele areas plaasgevind met aangesig-tot-aangesig onderhoude wat Maandag tot Vrydag tussen 07:00 en 17:00 gevoer is.
Volgens die Wes-Kaapse minister van mobiliteit, Isaac Sileku, het goed-funksionerende openbare vervoer 'n verreikende impak op ekonomiese ontwikkeling, armoedeverligting, maatskaplike integrasie en werkskepping in gemeenskappe.
Hy sê hulle moet weet of GO GEORGE die kol tref. "As 'n provinsiale vennoot vind ons hierdie opname die optimale hulpmiddel om terugvoer oor passasierservaring te kry."
Die opname staan bekend as die 2024 makro-, vervoer- en sosio-ekonomiese studie (MTSES) en word gedoen onder GO GEORGE-gebruikers, spesiale belangegroepe en ander belanghebbendes wat indirek deur die diens geraak word.
Dit fokus op die 'totale waarde' van die busdiens wat beteken dat nie-monetêre sowel as monetêre waarde in ag geneem is. Dit verskaf noodsaaklike inligting vir die beplanning en aanpassing van die diens om aan passasiers se behoeftes te voldoen, volgens Sileku.
Passasiersterugvoer en belangrike insigte
Benewens passasiersonderhoude is perspektiewe ingesamel van spesiale belangegroepe, insluitend die George Vereniging vir Persone met Gestremdhede, personeel van George Link (GO GEORGE se voertuigbedryfsmaatskappy), en passasiers wat in Thembalethu woon waar die eerste roete na hierdie gebied laat in 2023 uitgerol is.
GO GEORGE-bestuurder Morné Lakay sê die positiewe terugvoer herbevestig die busdiens se rol as 'n noodsaaklike openbare vervoerdiens wat veiligheid, toeganklikheid, mobiliteit en bekostigbaarheid prioritiseer.
"Inwoners van George beskou GO GEORGE as meer as net 'n vervoerstelsel. Hulle sien dit as 'n drywer van ekonomiese groei, omgewingsvolhoubaarheid en sosiale opheffing in die streek."
Lakay het die belangrikheid van die opname se gebruikersgerigte metodologie beklemtoon, wat akkurate insigte verseker.
Fokus spesifiek op gebruikers se tevredenheid
"Die MTSES 2024 is uitsluitlik gewy aan die bestudering van gebruikerstevredenheid. Geen nie-gebruikers is ingesluit in die opname nie."
'n Steekproef van 28% van GO GEORGE-passasiers is gebruik.
"Dit help ons om eienskappe van passasiersritte te verstaan en hoe passasiers 'n rit beplan en uitvoer. Ons kry 'n aanduiding van passasierspersepsies in terme van waarde vir geld, koste en bekostigbaarheid.
"Deur data wat van die nuwe Thembalethu-passasiers verkry is in te sluit, maar ook af te baken, het ons waardevolle inligting verkry terwyl ons voortgaan om meer roetes na hierdie gebied uit te rol."
Hoë tellings weerspieël toenemende tevredenheid
Opnameresultate toon sterk verbetering vanaf 2023, wat GO GEORGE se verbintenis tot die lewering van betroubare openbare vervoer van hoë gehalte versterk. Passasiers het groot tevredenheid uitgespreek op sleutelgebiede, insluitend:
* Toeganklikheid aan boord (96%)
* Veiligheid en sekuriteit aan boord (92%)
* Busbestuurders wat veilig, verantwoordelik en professioneel bestuur (97%)
* Betroubaarheid van diens (97%)
* Bushaltes se nabyheid aan bestemmings (94%)
* Geen kriminele gedrag op busse nie (93%)
* Passasiers wat sê dat hulle minder betaal deur GO GEORGE te gebruik (89%)
Bekostigbaarheid en ekonomiese impak
George-burgemeester Jackie von Brandis sê die prioritisering van belegging in 'n openbare vervoerstelsel is noodsaaklik.
"Dit blyk uit die resultate van hierdie opname. Ons passasiers identifiseer bekostigbaarheid as die belangrikste voordeel van die diens, wat een van die kernbeginsels van gesubsidieerde vervoerdienste is.
"Ons lewer hierdie diens sodat niemand gedwing word om 'n werksgeleentheid weg te wys omdat hulle nie kan bekostig om na 'n onderhoud of werkplek te reis nie.
"Die beleid van gratis oorklimgeleenthede binne een uur het, baie konserwatief geskat, sedert die aanvang van die diens minstens R43,3 miljoen in die sakke van ons passasiers gelaat."
Sy sê die mees direkte voordeel van die GO GEORGE-diens is die inkomste wat deur plaaslike maatskappye en verwante ondersteuningsbedrywe verdien word.
"Die ekonomiese impak van ons busdiens op die hele gemeenskap is enorm en verbeter hul lewensgehalte en werkspotensiaal, het Von Brandis gesê.
"Saam met die werksgeleenthede is daar 'n deurlopende program van opleiding en vaardigheidsontwikkeling wat met die projek geassosieer word, wat lei tot oordraagbare formele vaardighede in die arbeidsmag.
"Die George-munisipaliteit is baie trots om 'n vennoot in hierdie opbouende en bemagtigende projek te wees," het sy gesê.
Oorhandiging van terugvoerverslag
Wes-Kaapse premier, Alan Winde, sê die bevindings weerspieël die groeiende belangrikheid van die busdiens.
"Dit het die plaaslike en streeksekonomie positief verander, wat die lewenskwaliteit van duisende mense, insluitend passasiers, werknemers, besighede en diensverskaffers, direk beïnvloed. Ons is trots op die voortdurende groei en toewyding tot uitmuntende diens van die GO GEORGE-busdiens oor die afgelope tien jaar."
‘We bring you the latest Garden Route, Hessequa, Karoo news’
