GEORGE NUUS - 'n Jong model van George het haar merk op die nasionale verhoog gemaak toe sy haar eerste nasionale titel losgeslaan het.
Gia Gerber (11) is op Saterdag 6 April as Miss Global Princess South Africa Pre-Teen 2025 tydens 'n glansgeleentheid by die Dynasty Forest Hotel in Sandton, Johannesburg, gekroon.
Dié kompetisie is gemik op die bemagtiging van jong meisies en fokus sterk op selfvertroue, persoonlike groei en talentontwikkeling, iets wat Gia duidelik getoon het.
Benewens haar hooftitel, het sy ook al die ekstra afdelings waarin sy deelgeneem het gewen, naamlik Academic, Photogenic en Fun Fashion. Sy het ook die beoordelaars beïndruk tydens haar onderhoud met haar selfvertroue en uitstekende kommunikasievaardighede.
Tydens die modeparade het Gia met gemak oor die loopplank gestap vir beide plaaslike en internasionale ontwerpers, insluitend Young Gods, Macrae Sky, Carita Adams, Paisley en Sompire Kids.
Gia se modelloopbaan het in Oktober 2022 afgeskop toe sy by Ace Models Moss-George aangesluit het onder leiding van Elani Pretorius. Waar sy eers skaam was, het sy mettertyd ontwikkel tot 'n selfversekerde jong model wat reeds verskeie titels op haar kerfstok het.
Dit sluit in Miss Pearl 2023, Miss Klein Hartenbos 2024 en Miss Body Beautiful 2023 en 2024 - tydens Ace se internasionale konferensie met sowat 800 modelle van oor Suid-Afrika.
As huidige titelhouer mag Gia nie aan ander kompetisies deelneem gedurende haar heerskappyjaar nie, maar haar fokus is nou op haar gemeenskapswerk. Sy beoog om haar platform te gebruik om ander jong meisies te inspireer en te bemagtig.
"Ek wil hê ander moet weet dis moontlik om jou drome te volg - as jy in jouself glo," sê sy.
Gia se droom? Om ander te laat groei, hulle te help om selfvertroue te bou, en met trots hul eie pad te stap.
‘Ons bring jou die nuutste Tuinroete, Hessequa, Karoo nuus’
