GEORGE NUUS - Drie mans is vroeër vandag, Dinsdag 13 Oktober, dood nadat hulle na bewering in ’n tenk met ’n vermoedelik giftige stof op ’n plaas in die Heroldsbaai-omgewing geval het.

Volgens ’n polisiewoordvoerder, lt.kol. Malcolm Pojie, is altesaam 15 mense deur die voorval geraak.

Drie mans is op die toneel dood verklaar, terwyl 12 ander na die hospitaal geneem is. Een van die 12 is as ’n ernstige geval  geklassifiseer, terwyl die ander 11 slegs geringe blootstelling opgedoen het.

Volgens die voorlopige inligting het die voorval tydens skoonmaakwerk by die tenk plaasgevind. Die presiese omstandighede waaronder die drie mans in die tenk beland het is nog nie duidelik nie.

Forensiese deskundiges is op die toneel om ondersoek in te stel en meer duidelikheid oor die omstandighede van die voorval te kry.

Die polisie het ’n geregtelike doodsondersoek geopen.

Die aard van die vermoedelik giftige stof en die presiese oorsaak van die drie mans se dood moet nog vasgestel word.

Die identiteit van die plaaseienaar kon nog nie vasgestel word nie. George Herald sal ’n medianavraag aan die eienaar rig sodra dié inligting beskikbaar is om kommentaar oor die voorval te bekom.

Hierdie is ’n ontwikkelende storie. Meer inligting sal bekend gemaak word sodra dit beskikbaar is.

‘Ons bring jou die nuutste Tuinroete, Hessequa, Karoo nuus’