Skoenboksprojek vier sy 16de bestaansjaar

GEORGE NUUS - Dit was soos enige ander dag by die werk, tot daardie een oproep wat haar lewe in soveel verskillende aspekte heeltemal verander het.

Hierdie oproep was gemaak deur Anneline Smith van Oudtshoorn en aan die ander kant van die telefoonlyn was Janine Pretorius, van die ACVV Môreson Kinder- en Jeugsorgsentrum.

Anneline wou weet of dit nie dalk moontlik sou wees om skoenbokse vir die kinders van die sentrum in te samel vir Kersfees nie. Janine, getrou aan haar geaardheid, het nie twee keer daaroor nagedink nie.

Saam het die twee nie op hulle laat wag nie en ingespring om die droom 'n realiteit te maak. Die belangstelling het hul wildste verwagtinge oortref deurdat hulle vir elke kind daardie jaar nie net een nie, maar selfs twee skoenbokse kon gee, en so is die Skoenboksprojek begin.

Met hierdie twee ystervroue aan die stuur, het die projek later so uitgebrei dat hul nie net een organisasie nie, maar vele ander regoor die streek jaarliks met skoenbokse kan seën.

Janine hanteer die George en nabye omgewing se geskenkbokse en Anneline die in Oudtshoorn. Hulle het intussen ook vir Yolandi Claassens nadergetrek, wat die Mosselbaai bokse hanteer.

Hoe jy kan help

Wanneer jy jou verbind tot 'n boks, sal jy 'n kind of bejaarde se naam ontvang vir wie jy dan 'n skoenboks moet vul, tot en met die waarde van R250 (vir eenvormigheid).

Daar is geen amptelike vereistes van wat alles in die skoenboks moet wees nie, behalwe dat 'n lekkerny absoluut verpligtend is. Hierdie maak die skoenbokse natuurlik uniek, want daar is nie voorgeskrewe items in die bokse nie, wat beteken die boks word spesiaal vir die betrokke kind of bejaarde gepak.

Indien jy nie self die skoenboks kan pak nie, maar steeds 'n boks wil borg, is jy welkom om 'n finansiële bydrae te maak en een van die organiseerders sal namens jou die boks gaan aankoop.