GEORGE NUUS - Die aanry van vragte voer uit die Suid-Kaap na die noorde om boere in droogtenood te help, het nie gedurende Desember tot stilstand gekom nie.
Verskeie vragte is na Bloemfontein, 'n sentrale verspreidingspunt, geneem danksy skenkings uit verskillende oorde: vervoermaatskappye wat vragmotors en drywers beskikbaar gemaak het, kontantskenkings wat vir diesel ontvang is, en boere wat nog voer gegee het.
Reën het Maandag verligting gebring in dele van die droogtegeteisterde Vrystaat en Noord-Kaap en Dinsdag teen saktyd is berig dat deurdringende reën ook in Limpopo en Gauteng geval het. Daar was berigte en foto's op sosiale media van boere wie se plaasdamme vol gereën het. Die Facebook-groep, 'Boere in Nood' het foto's gehad van 'n plaas in die Welkom-omgewing waar 'n boer wat in droë grond geplant het, 18 mm reën gekry het.
'n Vrag voer, geskenk deur die Gerber-boerdery van Hoekwil, het Maandag uit George na Bloemfontein vertrek nadat Paul Maritz Trust (PMT) Transport 'n vragmotor en drywer beskikbaar gestel het en Neels Els van Tyco diesel geskenk het. Skenkings deur Louis Wessels van JDM Drilling van Jeffreysbaai, Pypies van Rensburg van Groot-Brakrivier en Jimmy van der Merwe van Hitech Truck and Trailer het nog twee vragte van George oor die vakansieseisoen moontlik gemaak.
Albertinia Meubelvervoer het ook vroeër die week meer as 2 000 liter water (waarvan sowat 1 900 liter deur Just Water geskenk is) gelaai om na Winburg en Senekal te neem.
Elaine Fourie, eienaar van The Coffee Company wat help met die koördinering van die hulpprojek in die Suid-Kaap, het gesê hulle het kontantskenkings van so ver as Engeland en Dubai ontvang.
'n Lootjiekompetisie word ook op die Facebook-groep, ‘Boere in Nood’' aangebied om geld in te samel. Verskeie pryse is hiervoor geborg, waaronder 'n spesiale Bloubulrugbybal, skilderye, 'n buffelbul ter waarde van R100 000 en 'n naweek vir twee in Clarence. Kaartjies is te koop by www.itickets.co.za.
Volgens Fourie is meer as 1 000 aansoekvorms vir droogtehulp deur boere ingevul.
"Ons het al begin voer aankoop omdat skenkings minder word," het sy gesê.Die Nasionale Droogterampfonds wat Senwes en AgriSA twee maande gelede op die been gebring het, staan tans op meer as R1,8 miljoen.
Reën is vir dele van die Vrystaat en Nood-Kaap gedurende die week voorspel, en Saterdag kan reën oor die hele land verwag word.
Aid from the Southern Cape for drought-stricken areas did not come to a halt during the December holidays. Several loads of forage donated by local farmers were driven to Bloemfontein where a central distribution point has been set up. On Monday, another truck-load, donated by Gerber Farms in Hoekwil, left George.
Klik hier vir vorige artikels:
- Nog voer uit George na droogtegebiede
- Voer vir droogtehulp daar, maar geen vervoer
- Droogtehulp vir boere
ARTIKEL EN FOTO: ALIDA DE BEER, GEORGE HERALD-JOERNALIS
'Ons bring jour die nuutste George, Tuinroete nuus'
