LANDBOU NUUS - Die Limousinras is besig om hom in alle dele van die land te bewys as die ideale ras vir kruisteling – enersyds omdat hy bekend is vir kalwingsgemak, bo-gemidelde speenmassa, hoë uitslagpersentasie en goeie vleis tot beenverhouding.
Die ras se nuwe logo is nie verniet Much More (Meat) nie,” sê Hennie Potgieter van die plaas Limerick in die Calitzdorp-omgewing en voorsitter van Wes-Kaap Limousin-klub.
Volgens Potgieter word die Limousinras in ‘n nuwe rigting gestuur om sy aanpasbaarheid bo alle twyfel te bewys.
“Ons beweeg met die ‘nuwe’ Suid-Afrikaanse Limousin weg van die massiewe Europese Limousin na ’n meer gladdehaar mediumraamdier met ’n dieper lyf.
“Ons Limousins vreet minder, loop beter vir wei, en kompeteer ook goed met ander mediumraamrasse. Ek kan drie mediumraamkoeie van 550kg elk aanhou wat net soveel vreet as twee grootraamdiere van 600kg, en dit is logies dat ek meer geld kan maak met drie koeie as met twee.”
Met die mediumraamkoeie word geslagsrypheid vroeër bereik, hul vrugbaarheid is merkbaar beter, terwyl hul aanpasbaarheid uitstekend is, meen hy.
Die ouer en groter Limousinkoeie het eers op 40 maande gekalf teenoor die 36 maande van die huidige mediumraamkoeie.
“Omdat ons ekonomies volhoubaar moet wees, selekteer ons nou om verse reeds op 30 maande te laat kalf,” haal Johan Coetsee Potgieter aan in Landbouweekblad.
Hierdie inligting en die nuwe logo is onder die temas wat ter sprake gaan kom op die Kaap Limousin Boeredag wat op 24 Maart by Outeniqualand Landbouverenigingsaal plaasvind.
“Ons gaan hierdie eienskappe van die Limousin op verskeie plase ondersoek,” sê Potgieter.
Ander hoogtepunte op vanjaar se Limousin-program is 15-16 April 2015: Junior Limousin beoordelaar/keurderkursus by Sas Oosthuizen op Wellington.
Koste R500. Kontak Hennie Potgieter om jou plek te bespreek.
1-2 Mei 2015 Limousin Telersgenootskap Algemene Jaarvergadering en Versveiling te Bloemfontein
14 Augustus 2015: Fokus op Limousins in Landbou Burger
20 Augustus 2015: Wes-Kaap Limousin Klub Boeredag by Sas Oosthuizen op Wellington
27-29 Augustus 2015: George skou
29 Augustus 2015: La Rhone Limousins Heart of the Herd 2015 veiling op Tulbagh
9-11 September 2015: Moorreesburg skou
16-19 September 2015: Agri Megaweek Bredasdorp
30 September 2015: Limerick Limousins Produksieveiling
15-17 Oktober : Sandringham Livestock Expo
Vir meer inligting, kontak Hennie Potgieter by 044 213 3361 limerick@telkomsa.net
'n Mooi klompie kruiskalwers bymekaar. Foto's verskaf.
ARTIKEL: TISHA STEYN, OUDTSHOORN COURANT KORRESPONDENT.
'Ons bring jou die nuutste Suid-Kaap nuus'
