SUID-KAAP NUUS - Sjef Bruce von Pressentin van die Delheim-restaurant tree Donderdag 6 Oktober by die Suid-Kaap Fynproewersgilde in die Mosselbaai-stadsaal op. Die oggend begin om 09:00 vir 09:30.
Von Pressentin het sy studies in Suid-Afrika voltooi waarna hy na Engeland vertrek het om by die gesogte Wedgewood- (Edinburgh) en Terre à Terre-restaurant (Brighton) waardevolle ondervinding op te doen.
Terug op Suid-Afrikaanse bodem begin hy by die Delheim-restaurant waar hy tans hoofsjef is. Sy styl is klassiek-Frans met 'n knypie Britse invloed en moderne Suid-Afrikaanse cuisine.
Geregte wat gedemonstreer gaan word, is:
Panko- gekrummelde eiervrug, bokmelkkaas (gerol in sesamsaad), caponata, stadig geroosterde tamatiesous, parmesaansnippers, roketpesto;
Earl Grey- gerookte salmforel, ertjiesalsa verde, krakerige aartappelstokkies;
Pangebraaide volstruisfillet, gepiekelde rooikool, reënboogspinasie, appelasyn-jus;
Valrhona-sjokoladeterrien, krakerige gevriesde joghurt, haselneutheuningkoek, grondboontjiebottermousse.
Mense wat die geleentheid as gas wil bywoon, kan DeVille by 083 462 5558 om plek te bespreek. Die koste is R150 per persoon.
'Ons bring jou die nuutste Tuinroete, Klein Karoo, Hessequa nuus'
