GEORGE NUUS - Born to win, 'n Christelike rolprent wat twee jaar gelede in George verfilm is, is oor die naweek aangewys as die beste vollengte film by die Sabaoth International Film Festival in Milan, Italië.
Die regisseur, Frans Cronjé, was daar om die trofee te ontvang.
"Die doel waarmee ons ons rolprente maak is nie om toekennings te ontvang nie, maar eerder om mense te inspireer.
Daarom was dit vir ons 'n groot verrassing en eer om hierdie toekenning te ontvang. Hierdie filmfees is een van die mees erkende Christen-filmfeeste in die wêreld en ons het ook in 2006 met Faith like Potatoes 'n toekenning daar gekry vir die People's Choice Award.
Om 'n rolprent te maak, is 'n baie groot spanpoging en ek is baie trots en dankbaar teenoor ons hele span, veral Cobus van den Berg wat ons vervaardiger was, en die burgemeester van George, Charles Standers, en sy span wat ons so fantasties bygestaan het," het Cronjé gesê.
Standers, het sy vreugde oor die nuutste erkenning vir Born to Win uitgespreek: "Dit was 'n eer en voorreg om betrokke te wees by die verfilming van Born to Win. Dit was 'n plesier om met die produksiespan te werk, en ons verwelkom die bemarking van George in die internasionale arena, " het hy gesê.
Rolprente vanoor die wêreld kon inskryf vir die filmfees en uiteindelik is net die topvier aangewys om op die groot skerm te draai.
Born to Win is verlede Vrydagaand op die groot skerm gewys en meer as 300 Italianers was ingepak om die rolprent te sien met Ita-liaanse subtitels.
In a very intelligent way Frans portrays how reality can call on the supernatural to make a difference in real circumstances.
And how God can change even the most painful situations."
Cronjé was ook twee maande gelede in Marienberg, Duitsland, by die Duitse première van Born to Win. Die rolprent is in Duits vertaal en die reaksie daar was net so positief. Aan die einde van Junie is die jaarlikse International Christian Visual Mediakonferensie in Orlando, VSA, en Born to Win is genomineer in drie kategorieë onder meer beste film.
Die ICVM is die grootste bymekaarkomplek vir Christen-filmvervaardigers in die wêreld en is die 'Academy Awards'-eweknie vir Christen-films.
Die stad van George sal voortgaan om George te bemark as 'n internasionale en plaaslike filmbestemming.
Die landwye en internasionale sukses van Born to Win is 'n bewys dat hierdie strategie die ekonomiese ontwikkeling van George 'n hupstoot kan gee.
Verwante artikels:
'Ons bring jou die nuutste George, Tuinroete nuus'
