Liggaam tussen rotse gevind

Die AMS-helikopter op soek na Marcellino Baardman. Foto: Malcolm Pojie.

GEORGE NUUSFLITS - Twee vissermanne het laat gistermiddag, 13 Maart, op ‘n liggaam in die Gwaiingriviermond by Pacaltsdorp afgekom.
 
Reddingswerkers van Metro-nooddienste het voor 19:00 die liggaam uitgedra van waar dit tussen rotse vasgekeer was en aan beamptes van George-patologie oorhandig. Die polisie was ook op die toneel.
 
Kapt. Malcolm Pojie, die Suid-Kaapse polisiewoordvoerder, het vanoggend gesê die identiteit van die oorledene is nog nie bekend nie.
 
“Die identiteit van die persoon is nog onbekend en die toestand van die liggaam, wat ook baie bleek was, is van so ‘n aard dat hy nie uitgeken kon word nie. ‘n Lykskouing sal môre gedoen word. Ons sal vandag met die familie van die jong man wat onlangs by die strand verdrink het vergader om die moontlike identiteit vas te stel.”
 
Die polisie vermoed dat die liggaam die van Marcellino Baardman (21) van Pacaltsdorp is. Baardman het Sondag 5 Maart in die see by die Gwaiingriviermond verdwyn.
 
Baardman het saam met sy neef, Jonty Naudé (23) geswem toe Naudé in die moeilikheid beland. Hy het hom na bewering probeer help, maar is toe self deur sterk strome meegesleur. Naudé kon daarin slaag om na veiligheid te swem en teen die rotse uit te klim, maar Baardman het onder die water verdwyn
 
Klik hier vir verwante artikels:

Lees die nuutste hier.

ARTIKEL: LIZETTE DA SILVA, GEORGE HERALD-NUUSREDAKTEUR

'Ons bring jou die nuutste George, Tuinroete nuus'


Show comments

Copyright 2017 Group Editors Co PTY Ltd t/a George Herald