490 graad 1's in Pacaltsdorp ingeskryf

Graad 1's Keavon Fry, Klimeshia Scheepers en Markwin Kaptein (van links) is nog bietjie onseker oor hierdie nuwe ervaring van skool toe gaan. Hulle is leerders van New Dawnpark Primêr.

GEORGE NUUS - Die drie laerskole in Pacaltsdorp het gesamentlik ongeveer 490 graad 1's op die skoolbanke vanjaar.
 
Dellvillepark Primêre Skool se graad 1-getalle het met 'n stywe 40 kinders gegroei vergeleke met verlede jaar en 180 graad 1's is ingeneem.
 
Die hoof, Robert Grootboom, het Woensdagoggend gesê hulle is tot kapasiteit gevul.
 
"Daar is egter nog ouers wat vanoggend hul kinders kom inskryf en ons gaan kyk hoe ons hulle kan akkommodeer."
By Pacaltsdorp Primêr was die tendens andersom en daar is vanjaar vyf graad 1-klasse teenoor verlede jaar se ses. Waar 218 kinders verlede jaar ingeskryf is, het die skool vanjaar 190 graad 1's. Geen graad 1's is weggewys nie.
 
New Dawnpark Primêr het 120 graad 1's verwelkom - 15 meer as verlede jaar. Geen inskrywings is weggewys nie.
Die skoolhoof, Peter Fielies, het gesê daar is gemiddeld 40 kinders per klas.
 
 
 
Juffrou Kelly-Ann Hector se vriendelike glimlag het haar klas by Dellvillepark Primêr dadelik welkom laat voel. Halle Heyns (links) en Cailine Witbooi het hulle plekke reg voor in die klas ingeneem. Foto's: Alida de Beer
 
'Ons bring jou die nuutste George, Tuinroete nuus' 


Your Comments

Copyright 2017 Group Editors Co PTY Ltd t/a George Herald