Moedersdag met 'n Franse geur

Gelicka Bucker is op 4 Mei die gassjef by die Suid-Kaap Fynproewersgilde.

SUID-KAAP NUUS - Die lede van die Suid-Kaap Fynproewersgilde en hulle gaste gaan Moedersdag, Donderdag 4 Mei op 'n eg Franse manier vier. Die geleentheid vind plaas om 09:00 vir 09:30 by die Mosselbaai-Suid NG kerksaal.
 
Gelika Bucker, die gassjef, is alreeds vir meer as sewe jaar in die bedryf.
 
Sy het grootgeword op 'n klein dorpie in Gauteng waar haar ouers die enigste restaurant bedryf het. Hier, veral onder haar ma se leiding, het haar liefde vir kos en wyn sy oorsprong gehad. Na haar studies het sy Engels in Suid-Korea onderrig en dit het uitgeloop op 'n wonderlike internasionale smaakavontuur.
 
Sjef Gelika gaan die volgende smullekkergeregte demonstreer:
 
Peper-makrolletjies gevul met gerooktesalmroom-bouillabaisse (vars stokvis, groot steurgarnale, mossels);
Gedekonstrueerde filet, beenmurg, béarnaise-sous, puree van vingerskorsies (courgettes);
Croissants aux Amandes (croissants met 'n amandelvulsel);
Gebakte donkersjokolade kaaskoek.
 
Hierdie romantiese affaire met die Franse mag nie misgeloop word nie. Gaste is hartlik welkom en belangstellendes word genooi om by die gilde aan te sluit.
 
Kontak Elaine Louw by 083 263 5417 om u plek te bespreek. 'n Kaartjie is R150. Ons nooi alle belangstellendes om by die gilde aan te sluit.
 
"Niemand hier is kenners nie. Ons leer almal gesellig saam," sê Elaine.
 
'Ons bring jou die nuutste Tuinroete, Klein Karoo, Hessequa nuus'


Your Comments

Copyright 2017 Group Editors Co PTY Ltd t/a George Herald