George Herald | Agrella vlymskerp met swaard

Translate to:


News	Classifieds	Directory

Agrella vlymskerp met swaard
08:00 (GMT+2), Thu, 12 July 2012

Susan Agrella, George se trots op die skermbaan.

GEORGE NUUS - Outeniqua Skermklub se afrigter, Susan Agrella, het in Bloemfontein aan die jaarlikse Senior Nasionale Skermkampioenskappe deelgeneem en teruggekeer met 'n goue medalje in die dames florette en silwermedalje in die spanafdeling in dames skermdegen (épée).

Die kompetisie was hierdie jaar besonder straf omdat verskeie van die deelnemers die afgelope 4 jaar deel uitgemaak het van 'n Olimpiese kwalifiseringsprogram en aan verskeie internasionale kompetisies deelgeneem het. Suid-Afrika se dames Skermdegen (épée)-span het ten einde laaste die Olimpiese kwalifisering met net 3 punte gemis.

Verskeie van die junior deelnemers het nie net aan die Statebondspele in Jersey deelgeneem nie, maar ook aan die Junior Wêreldkampioenskappe in Moskou.

Die standaard van skerm in Suid-Afrika is dus besig om dramaties te verhoog. Daarom is daar ook met 'n groot ontwikkelingsprogram begin wat veral gemik is op die plattelandse areas waarvan George en omgewing 'n geïdentifiseerde gebied is vir hierdie program.

Daar is reeds, behalwe die Outeniqua-klub in George, ook 'n klub in Wildernishoogte en toestemming is bekom vir 'n klub by Touwsranten. Die ontwikkeling is nie net gerig op skoolgaande atlete nie, maar ook volwassenes en veterane.
In die VSA is daar tot 40 veterane per klub en kan hulle dus hulle eie kategorie-kompetisies hou. Die huidige mikpunt vir veterane is om te kwalifiseer vir die Statebondspele in Skotland in 2014.

Oefeninge vir werkendes is nou ingestel vir Woensdagaande by die Voortrekkersaal in George. Benodigdhede soos wapens, maskers en klere word verskaf.

Vir meer inligting kan met Susan gekontak word by 082 717 7924.