George Herald | Splinternuwe basis vir Outeniqua boere

Translate to:


News	Classifieds	Directory

Splinternuwe basis vir Outeniqua boere
14:00 (GMT+2), Thu, 12 July 2012

Die brand het die John Steyl-saal se mure tot so ‘n mate beskadig dat die hele gebou gesloop en van die grond af herbou moes word.

GEORGE NUUS - Die Outeniqualand Boere-vereniging het op 6 Augustus verlede jaar hul 80ste bestaansjaar met 'n gesellige manne-ontbyt in hul eie klubhuis by Geelhoutboom gevier en twee weke later moes hulle toesien hoe die saal deur vlamme verswelg word.

Maar hierdie week is die splinternuwe saal feestelik in gebruik te neem.

Die uitbetaling van die versekering was nie naastenby genoeg om die fasiliteit te herbou nie, maar die lede het skouer aan die wiel gesit en deur middel van fondsinsamelings en hulp van borge 'n moderne en heelwat meer verbruikersvriendelike saal opgerig. Nou spog hulle met een van die beste fasiliteite wat enige boerevereniging kan begeer.

Behalwe die vereniging het die VLV Outeniqualand ook 'n tuiste in die saal gevind. Hulle het reeds breekgoed en kombuisgereeldskap aangeskaf en is gereed om funksies van tot 100 mense te huisves.

Tydens die ingebruikneming het die voorsitter van die vereniging, Bossie Terblanche, veral die borge lof toegeswaai vir die wyse waarop hulle hand in die sak gesteek en die fondsinsameling gesteun het. "Ons wil almal wat 'n bydrae gemaak het hartlik bedank en hoop hulle gaan ook eienaarskap neem van die pragtige fasiliteit wat 'n grootse spanpoging was."