|
|
|
|
Die president van Nomads Rolbal in Suid-Afrika, Gerrie van Rensburg, rol hier met die blou kleurbaadjie een van die eerste balle in die nasionale toernooi. Die stadsraadslede wat saam met hom rol is van links rdl. Iona Kritzinger, Charles Standers (uitvoerende burgemeester), rdl. Bevin Fortuin en Daniel Maritz (uitvoerende onderburgemeester).
|
GEORGE NUUS - Stadsvaders van George, waaronder Charles Standers, die uitvoerende burgemeester, het Sondag die eerste balle gerol in die Nasionale Dames Nomads Rolbaltoernooi wat hierdie week op George gespeel word.
Twaalf spanne, wat deur 112 spelers verteenwoordig word, neem vanjaar aan die toernooi deel.
Na afloop van die openingseremonie, waartydens die hooggeplaastes die eerste balle gerol het, het die spanne, begelei deur 'n doedelsakspeler, op die baan gegaan en die distriksvlae gehys. Behalwe die boodskap van die burgemeester het die president van Nomads Suid-Afrika, Gerrie van Rensburg en die president van Suid-Kaap Rolbal, Jenny Sinclair, ook kort boodskappe gelewer.
Nomad Rolbal is in 1980 in die Grens gestig gevolg deur die Oostelike Provinsie en Swaziland. Tans is daar 20 distrikte in die land en bestaan uit ge-registreerde rolbalspelers van die onderskeie klubs.
Nomads speel elke maand vir fondsinsameling wat gebruik word om hulp te verleen aan behoeftige sake. Dit is die Nomads se beginsel om donasies van goedere, produkte of dienste aan lede of groepe in die gemeenskap te maak.
Die laaste wedstryde word Vrydag gespeel waarna die toernooi afgesluit word.
|