George Herald | Praktiese beleggingsadvies: Bestudeer die maatskappy

Translate to:


News	Classifieds	Directory

Praktiese beleggingsadvies: Bestudeer die maatskappy
10:46 (GMT+2), Mon, 11 June 2012

SAKE NUUS - Omdat 'n aandeelhouer nie so seker is van die opbrengs op sy kapitaal soos 'n renteverdiener nie, sal 'n aandelebelegger nie aandele koop sonder 'n taamlike goeie kans op 'n hoë opbrengs nie.

'n Aandeelhouer soek dus altyd vergoeding vir die risiko wat hy loop. Dit verg deeglike studie van die onderneming waarin hy of sy oorweeg om in te belê. Verlede week is die maatskappy se raad en direkteure beoordeel en die mededingers en die koste van toetrede tot die industrie is in oënskou geneem. Hier volg ander kritiese areas van 'n maatskappy wat bestudeer moet word voor jy daarin belê:

Markaandeel
Dit is soms moeiliker vir 'n klein maatskappy om teen 'n maatskappy met 'n dominante markaandeel mee te ding as gevolg van ekonomieë van skaal. Dit geld nie altyd dat 'n industrieleier egter dominant sal bly nie, maar om so 'n maatskappy aan te vat kan baie duur en riskant wees.

Unieke verkoopsvoordele
So kan dinge soos patentregte, besondere alleenagentskappe, langtermynkontrakte, ens. in sekere gevalle tot groot voordele in die mark strek.

Handelsmerke
Sterk handelsmerke weerspieël jare lange en duur produkontwikkeling en bemarking, maar hou groot voordele in en verhoog 'n maatskappy se waarde aansienlik. So ook versprei die besit van 'n reeks goeie handelsmerke die die risiko van 'n maatskappy aangesien die goeie prestasie van sommige kompenseer vir ander onderpresteerders.

Vergelyk die maatskappy met mededingers en selfs met soortgelyke maatskappye oorsee
'n Goeie bestuurspan asook 'n voornemende belegger moet ook beslis hierdie hulpmiddel gebruik om die prestasie van die maatskappy te meet. Maatstawwe soos kontantvloei, verdienste per aandeel, dividende, batewaarde, prys/verdienste verhouding, opbrengs op kapitaal, maatskappyskuld in verhouding tot aandeelhouerskapitaal, bedryfsmarges, ens. kan hier as nuttige maatstawwe gebruik word.

Kwaliteit van produkte en dienste en nismarkte waarin teenwoordig is en toegetree kan word
'n Beeld van hoogstaande kwaliteit in 'n bedryf en 'n reputasie daarvan onder die verbruikerspubliek is uiters waardevol en kan groter vraag, premiepryse asook groter markaandeel en derhalwe beter marges en winste meebring.

Buitelandse markte
Uitvoere beteken hoër volume-produksie, verlaagde eenheids- en oorhoofsekostes, groei in opbrengste en verdere moontlikhede vir groei en ontwikkeling en uitbreiding na ander lande ook wat oorsese vennootskappe en produksie tot gevolg kan hê.

Met hierdie kennis tot u beskikking behoort u 'n goeie begrip van die maatskappy waarin u belangstel te vorm en verder wil ondersoek ten opsigte van u persoonlike voorkeure en waarmee u gemaklik sal wees in 'n beleggingsportefeulje.

'n Volgende keer sal gekyk word na verdere leeswerk en bronne vir meer inligting omtrent sommige markkragte wat aandelepryse van tyd tot tyd beïnvloed, die reaksie daarop en bestuur daarvan en sekere leidrade vir prysbepaling by die aankoop van aandele vir langtermynbelegging, alhoewel laasgenoemde baie van indiwiduele persoonlikheid, natuurlike aanvoeling en voorkeure sal afhang en baie sal verbeter met tyd in die mark en persoonlike ondervinding daarin opgedoen.