George Herald | Agri vra veediefstal-samewerking

Translate to:


News	Classifieds	Directory

Agri vra veediefstal-samewerking
11:30 (GMT+2), Fri, 01 June 2012

Waar boere se diere nie gemerk was nie, het Justisie die afgelope tyd nie eens die sake hanteer nie.

LANDBOU NUUS - Landbouers is deur die Suid-Afrikaanse Polisiediens se veediefstaleenheid versoek om voortaan te sorg dat daar op elke plaas 'n veeregister sal wees, waarin veegetalle duidelik aangetoon word. Hierdie getalle moet ook gereeld bygewerk word.

Die versoek kom van Piet Lodder, hoofbestuurder van Agri Klein-Karoo, wat onlangs met die veediefstaleenheid en lede van verskillende SAPD stasies se ondersoekeenheid vergader het.

Lodder sê die departement van justisie maak dit tans baie moeilik vir die veediefstaleenheid om hul werk in die hof te bekragtig. Verskeie tekortkominge in die ondersoekwerk van die SAPD word telkens gebruik om die prosesse te verlangsaam en selfs uit die hof te gooi.

Dit sluit in dat geen bewyse van veegetalle bestaan nie. Volgens die hof word veegetalle en datums van oortredings deur voormanne op plase geraai en onakkurate inligting vertraag prosesse ten gunste van beskuldigdes.

Merk van diere
Waar boere se diere nie gemerk was nie, het Justisie die afgelope tyd nie eens die sake hanteer nie. Hulle argument, en volgens Lodder tereg ook so, is dat hulle nie kan bewys wie se diere dit is as hulle nie gemerk is nie.

Bywoning van sake
Lodder wys daarop dat daar net eenvoudig te veel veediefstalsake op die hof se rol is waar die proses sy gang gaan, maar sodra die saak in die hof is, onttrek die klaer/klaagster. Dit is tyd- en geldvermorsing.

"Verder is dit ook nodig dat ons teenwoordig moet wees tydens vonnisoplegging om te verseker dat behoorlike strawwe gegee word. Ek besef dat tyd nie altyd aan ons kant is nie, maar ons sal van Agri Klein-Karoo se kant af, met justisie onderhandel om dit in ag te neem wanneer sake op die rol geplaas word." het hy gesê

Hy het boere versoek om aan die sake aandag te gee ten einde die werk van die SAPD op plase meer doeltreffend te maak en te verseker dat misdaad bekamp word en afneem.