George Herald | Goue tyd kom vir landbou

Translate to:


News	Classifieds	Directory

Goue tyd kom vir landbou
14:37 (GMT+2), Mon, 28 May 2012

LANDBOU NUUS - Daar is 'n 'goue tydperk' voor die deur vir landbou. Dawie Roodt, senior ekonoom van die Efficient-groep het by die 2012 TLU SA Jongboerkonferensie gesê, wêreldwye ekonomiese groei gaan oor die volgende 50 jaar ontplof, en landbou word as 'n 'n "goue" sektor in hierdie groei beskou.

Alani Janeke berig dat Roodt meen die ongelooflike groot vraag na voedsel wat in komende jare gaan ontstaan, " beteken goeie tye lê voor vir die landbou. Een ding is seker, daar is nie meer plek vir net plein boere in Suid-Afrika nie," het Roodt gesê. "As jy nie 'n boer én sakeman is nie, gaan jy nie oorleef nie."

Belastingbetalers kry min vir geld
Roodt het gesê: "Maak seker dat jy so min moontlik belasting binne wetlike bepalings betaal." Hy meen die belastingbetaler se las is baie hoog, as in ag geneem word hoeveel waarde 'n belastingbetaler vir elke rand wat hy bestee, kry.
"As 'n mens in terme van randwaarde dit ontleed, kry 'n belastingbetaler vir elke R1 wat hy betaal, maar sowat 5c se dienste vir sy geld." Hy sê die grootste hoeveelheid belastinggeld word aan maatskaplike toelaes bestee, waarna onderwys tweede in die ry staan.

Rentekoerse laagste in 30 jaar
Wat rentekoerse betref het Roodt daarop gewys dat die staat nie 'n keuse gaan hê anders as om rentekoerse weer te verhoog nie. Die land se reële rentekoers staan tans op -0,5%, aangesien die repokoers op 5,5% staan, terwyl die Verbruikersprysindeks op 6% staan.

"Die staat gaan nie 'n keuse hê as om rentekoerse te verhoog nie, want die huidige situasie benadeel ons spaarrekening." Hy vermoed wel dat dit eers aan die begin van volgende jaar sal gebeur."

Suid-Afrika se rentekoerse is die laagste in 30 jaar, "so as jy geld wil gaan leen is nóú die tyd! Nou is die beste tyd om geld te leen om jou sake-onderneming uit te brei," het Roodt aangemoedig.

Staat bedreig die ekonomie
Volgens hom is die grootste bedreiging vir die Suid-Afrikaanse ekonomie 'n staat wat nie bevoeg is vir sy taak nie. "Ons moet wel onthou dat die finansiële sektor die grootste opposisie in die land is, en hulle sal groot makro veranderings teenstaan."
Roodt voorspel dat die ontwikkelende ekonomieë teen die einde van dié jaar groter as ontwikkelde lande sal wees. Dié tendens is 'n herhaling van die geskiedenis. Hy het gesê sowat 600 jaar gelede was die ekonomieë van China, Indië en ander wêrelddele groter as Europa.