George Herald | ATKV: eerste toekenning in George gedoen

Translate to:


News	Classifieds	Directory

ATKV: eerste toekenning in George gedoen
16:00 (GMT+2), Thu, 24 May 2012

Imizamo Yethu Sekondêre Skool se skoolhoof, Derick Petersen ontvang die ATKV se heel eerste Sterskool-toekenning van die ATKV se besturende direkteur, Japie Gouws. Foto: Christo Vermaak

GEORGE NUUS - Die Afrikaanse taal en Kultuurvereniging (ATKV) se eerste Sterskool-toekenning is aan Imizamo Yethu Sekondêre Skool in Thembalethu, George oorhandig.

Hooggeplaasde bestuurslede van die ATKV het verlede Vrydagmiddag dié toekenning bygewoon. Onder die bestuurslede was Japie Gouws (besturende direkteur: ATKV) en dr. Dany Titus (hoof van die ATKV: kultuur).

In sy toespraak het Gouws gesê die ATKV se een belangrike fokus is onderwys. "Ons fokus nie net op Afrikaanse onderwys nie maar op die hele onderwyssisteem. Ons is bekommerd oor die stand van onderwys in Suid-Afrika en doen 'n beroep op ouers om besighede en kultuurbewegings om betrokke te raak by skole," het Gouws gesê.

Volgens Gouws het Imizamo Yethu se uitstaande verbetering in hul 2011 matriekuitslae, teenoor die 2010 uitslae onder die ATKV se aandag gekom, waarna hulle besluit het om die Stertoekenning aan hulle te oorhandig. Imizamo Yethu se matriekslaagsyfer het van 27% in 2010 na 82% in 2011 gestyg.

Gouws het die skoolhoof, Derick Petersen geloof vir sy goeie bestuursvernuf. "Die ATKV wil u baie geluk wens met hierdie uitstaande prestasie. U is 'n voorbeeld van wat gedoen kan word. Ons gee nie net erkenning aan die skool en wat julle hier vermag het nie maar wil ook die hele George-gemeenskap inlig van 'n Sterskool in hul midde."

Dr. Titus het sertifikate van erkenning aan die ouers en onderwysers van die beste presteerders in elke vak oorhandig.