George Herald | Lexus wys spoggerige hibriedmotor

Translate to:


News	Classifieds	Directory

Lexus wys spoggerige hibriedmotor
09:00 (GMT+2), Fri, 13 April 2012

Effens avant-garde met gevorderde tegnologie, maar binne bereik van voornemende kopers - ontmoet die Lexus hibried konsepmotor.

MOTOR NUUS - Lexus het vroeër vanjaar sy nuwe ontwerpkonsep vir 'n hibried-2+2-Sportkoepee by die Noord-Amerikaanse Internasionale Motorskou in Detroit onthul. Die LF-LC-konsepmotor word beskou as die grootste verandering in Lexus se geskiedenis, volgens Karl Schlicht, hoofbestuurder van die Lexus-produk- en bemarkingsbeplanningsafdeling.

Die maatskappy se Calty-ontwerpstudio in Newport Beach in Kalifornië is deur die Lexus-sentrum in Japan uitgedaag om 'n toekomstige hibried-sportkoepeekonsep te ontwerp.

Hulle wou dit effens avant-garde laat lyk met gevorderde tegnologie binne wat tog binne bereik van voornemende kopers sou wees.

Die LF-LC het 'n kenmerkende Lexus-spitsrooster en agteraansig. Weelderige kurwes vloei soepel en skep uitlokkende lyne, skadu's en hoeke. Die maaspatroon van die rooster word deur 'n diep aluminiumlys omring en neem 'n driedimensionele vorm aan met praktiese luginlate in die onderste hoeke van die sierrooster. Daglig-ryligte is 'n "L" vorm.

Die sy-aansig van die LF-LC is kragtige en dinamies - ongetwyfeld 'n ernstige bestuurder se motor. Die voertuig se lyne lê klem op rigting en beweging.

Die konsepmotor se glasdak pronk met 'n liggewig voorkoms wat aan moderne argitektuur herinner. In die geheel verbeter die koepelontwerp die bestuurder se uitsig terwyl dit ook 'n bydrae tot die motor se slanke lyne lewer.

TEGNOLOGIE
Verskillende analoog- en LCD-tegnologieë is in lae voor die bestuurder geplaas. Die onderste laag vertoon die temperatuur, brandstoftenkinhoud en die agtergrond vir die eko-meter. Die middelste vlak behels die ritmeter en meganiese inligting. Die heel boonste vlak huisves aanwysers vir die toereteller, spoedmeter en ekometer.

Oppervlakke regdeur die kajuit is 'n kombinasie van sagte, gladde leer en seemsleer met geborselde metaalafwerking en houtinsetsels. Die ligte renmotor-tipe voorste sitplekke het verskillende lae en herhaal die kontoere wat die binnekant van die kajuit kenmerk. Die ren-tipe stuurwiel is ook baie lig en het ingeboude kontroles en 'n aansitterknop.

Die agterwielaangedrewe LF-LC waarvan die enjin in die snoet gemonteer is, pronk met Lexus se gevorderde hibriedaandrywing, wat vir skitterende ryverrigting sowel as brandstofdoeltreffendheid sorg.